Connect with us

Politics

Macron bidasubirwaho agiye kugenderera u Rwanda

Perezida w’u Bufaransa, Emmanuel Macron, ategerejwe i Kigali mu ruzinduko rw’iminsi ibiri ruzahera ku wa Kane tariki 27 Gicurasi rugasozwa tariki ya 28 Gicurasi 2021.

Uru rugendo ruzaba ari urwa mbere agiriye mu Rwanda n’urwa Kabiri Umukuru w’Igihugu cy’u Bufaransa agiriye mu rwa gasabo kuva Jenoside yakorewe Abatutsi yaba.

Muri Gashyantare uyu mwaka, nibwo Ikinyamakuru Jeune-Afrique cyatangaje uru ruzinduko rwa Perezida Macron mu Rwanda ndetse kinemeza ko ruteganyijwe hagati y’ukwezi kwa Mata na Gicurasi uyu mwaka, mu gihe u Rwanda ruzaba ruri mu gihe cyo kwibuka Jenoside yakorewe Abatutsi mu 1994, akazaba aje kwifatanya nabo muri icyo gihe bibuka.

Nkuko amakuru dukesha IGIHE abitangaza,abari gutegura uruzinduko rwe mu Rwanda, babwiye iki kinyamakuru ko Macron azagera i Kigali ku wa 27 Gicurasi, akahava ku wa 28 Gicurasi, azaba ari ku wa Gatanu.

Mu ruzinduko rwe, igikorwa cya mbere azagirira mu Rwanda ni ugusurura urwibutso rwa Jenoside rwa Kigali ku Gisozi hanyuma anatahe Centre Culturel Francophone.

Centre Culturel Francophone izafungurwa na Macron, ni ikigo gifite igice cyisanzuye biteganyijwe ko kizajya kiberamo ibitaramo n’imyidagaduro itandukanye.

Ibi bisobanuye umubano mwiza ubu uri hagati y’u Rwanda n’u Bufaransa kuko ngo kuva Perezida Macron yajya ku butegetsi muri Gicurasi 2017, yatangiye gushaka uko yagarura uyu mubano ndetse Macron yashyizeho komisiyo yitiriwe Duclert ireba uruhare rw’Ubufaransa muri Jenoside yakorewe Abatutsi.

Imyaka itari mike yatambutse umubano w’ibihugu byombi ntiwari umeze neza, bitewe ahanini n’uko abacamanza b’Abafaransa bitwaye mu iperereza ryo kumenya icyahanuye indege y’uwahoze ari Perezida w’u Rwanda, Habyarimana Juvénal,gucumbikira abagize uruhare muri Jenoside ndetse no kugira bamwe bayipfoya.

Emmanuel Macron azaba abaye Perezida wa mbere w’u Bufaransa usuye u Rwanda, uhereye igihe Nicolas Sarkozy yasuraga u Rwanda muri Gashyantare 2010.

Muri Mata 2019, Perezida Emmanuel Macron yatumiwe n’abayobozi b’u Rwanda kuza kwifatanya n’Abanyarwanda mu gihe cyo kwibuka Jenoside yakorewe Abatutsi, gusa ntibyamukundiye kuza ahubwo yahagarariwe n’Umudepite witwa Herve Berville.

Perezida wa Repubulika y’u Rwanda, Paul Kagame ubu ari i Paris mu Bufaransa aho yifatanyije n’Abakuru b’Ibihugu na za Guverinoma zo muri Afurika mu Nama Mpuzamahanga yiga kuri Sudani, yakiriwe na mugenzi we w’u Bufaransa, Emmanuel Macron.

Ibiganiro hagati ya Perezida Kagame na mugenzi we Emmanuel Macron byabaye nyuma y’ukwezi hasohotse raporo ebyiri zacukumbuye uruhare rw’u Bufaransa muri Jenoside yakorewe Abatutsi mu 1994. Izi raporo zirimo iyashyizweho na Perezida Macron, yitiriwe Duclert ndetse n’iyashyizweho na Guverinoma y’u Rwanda yitiriwe ‘Muse’.

Izi raporo zombi icyo zahuriyeho ni uko u Bufaransa bwari buyobowe na François Mitterrand kuva mu myaka ya 1990 kugeza mu 1994, bwashyigikiye mu buryo bugaragara Leta yari iyobowe na Habyarimana Juvénal ari nayo yateguye inashyira mu bikorwa Jenoside yakorewe Abatutsi.


Written by Mugwiza Provy

Click to comment

Leave a Reply

Your email address will not be published. Required fields are marked *

More in Politics